منذ سنتين 00 كنت راجع البيت 00 لقيت خناقة كبيرة جدا بين مراتى مع محمد ابنى ــ 3 سنوات وقتها ــ وبعد السؤال ومعرفة السبب تبين لي الاتى : ــ
كانت مراتى مشغولة في المطبخ 00 فدخل عليها صاحبنا مستفسرا : ــ
ــ ماما 00 مش أنا وابراهيم ــ 4 سنوات وقتها ــ كنا في بطنك بس هو نزل قبل منى ؟
ــ آه يا حبيبي 0
ــ ماما 00 هو أنا معرفتش انزل قبل منه ليه ؟
ــ عشان أنت مكنتش لسة اتخلقت 0
ــ ماما 00 هو أنا مكنتش لسة اتخلقت ليه ؟
ــ عشان ربنا عايز كدة 0
ــ ماما 00 يعنى إيه أنا مكنتش لسة اتخلقت ؟
ــ يعنى كنت لسة مدخلتش في بطني 0
ــ هو أنا لما اتخلقت كنت في بطنك لوحدى ولا كان ابراهيم معايا ؟
ــ لا يا بابا 00 ابراهيم كان لوحده وبعد ما اتولد انت دخلت في بطني 0
ــ هو انتى عرفتى تخليني ادخل في بطنك ازاى ؟
احتارت مراتى في الإجابة على هذا السؤال ،، فقالت له : ابقى اسأل بابا لما ييجى من الشغل 0
ــ هو أنت ناسية يا ماما ؟
ــ آه يا حبيبي 0
ــ هو أنا لما كنت في بطنك كنت بعمل إيه ؟
ــ مكنتش بتعمل حاجة 0
ــ هو أنا كنت شاطر ومش بعمل شقاوة ؟
ــ آه يا حبيبي 0
ــ هو أنا كنت بلعب لعب هادى ؟
ــ آه يا حبيبي 0
ــ هو بابا كان بيجيب لي لعب عشان أنا كنت هادى ومش بعمل شقاوة ؟
مراتى زهقت 00 بس لازم ترد عليه وعشان كدة قالت له : ــ
ــ أه ياحبيبى 00 وخلاص بقى يا حمادة روح افتح الدش وشوف توم وجيرى دلوقتى 0
بس الولد كان عايز يعرف حاجة وعشان كدة قال لها : ــ
ــ أمال اللعب بتاعتى فين ؟
ــ هناك يا بابا في الدولاب بتاعك 0
ــ لأ يا ماما 00 أنا بسالك على اللعب اللي كانت معايا لما كنت في بطنك 00 هي فين ؟
طبعا مراتى مش فاضية للمسائل دي وعارفة انها لو قالت له انها اتكسرت أو ضاعت هيفضل يعيط ويعملها غاغة ويصدع لها دماغها وعشان كدة قالت له : ــ
ــ أنت نسيتها في بطني 00 حد قال لك تنساها ؟ أهو بابا دلوقتى لما يرجع هتقول له إيه ؟
ــ طب أنا عايز أجيبها 0
ــ تجيبها منين ؟
ــ من بطنك 0
ــ ما ينفعش 0
ــ مليش دعوة أنا عايز ادخل بطنك وأجيب اللعب بتاعتى عشان بابا ما يضربنيش 0
وطبعا مراتى كانت مستنيانى بفارغ الصبر 00 وأول ما دخلت البيت قالت له : ــ
ــ أهو بابا عندك روح اتصرف معاه في اللي أنت عايزه 0
طبعا لان مراتى كانت مشغولة في مطبخها ،، وكمان الولد أسئلته كانت متعبة اكتر من اللازم ،، عشان كدة هي معرفتش ترد عليه الرد المقنع 00 وسابتنى أنا وهو وجها لوجه ،، واستطعت أن أقنعه بالحقيقة المرة بالنسبة له وان مفيش لعب كانت معاه ولا حاجة خالص ،، وعشان أغير الموضوع كله قلت لهم : ــ
ــ مش النهاردة الخميس ؟ تحبوا نروح فين النهاردة ياولاد ؟
طبعا هما بيستنوا يوم الخميس دا عشان هو دا يوم الراحة الأسبوعية بتاعتى من المكتب وأنا عودتهم انى أفسحهم كل يوم خميس بالليل 00 فسارع ابراهيم وقال لي : ــ
عايزين نروح السيرك عشان نشوف الأسود 0
لكن محمد كان له رأى آخر ،، فقال : ــ
لأ يابا أنا عايز أروح أشوف الاهرامات 00 أنا عمري ما شفت الأهرام ولا ابو الهول يا بابا 0
فقلت له : ــ
إن شاء الله هنبقى نروح الأهرام في يوم تانى من أول الصبح عشان ممنوع حد يدخل جوة الأهرام بالليل 0
ففكر محمد في مكان جديد لم نذهب له من قبل وظل يقول : نروح فين نروح فين ؟؟ نروح فين نروح فين ؟؟ وأخيرا قال لي : ــ
إحنا ما رحناش الجنة قبل كدة يا بابا 00 إحنا عايزين نروح الجنة 0
فرفعت يدى للسماء وقلت : ــ
يارب إحنا عايزين نروح الجنة 00 يارب حقق أمنية محمد ابنى 0
اخوانى الأعزاء
إن عقول وقلوب الأطفال كالصفحة البيضاء ،، فحاذروا أن تلوثوها بلون آخر 0
إن أطفالنا اليوم هم شباب ورجال وقادة وعقول المستقبل 00 فإذا بذرنا في عقولهم الدين والفكر السليم ،، فسنجنى مستقبلا مفعما بالإيمان وجيلا صالحا يعتمد عليه في رفعة الإسلام وإذلال الشرك والمشركين 0
|
العرض العادي
