[b][b][b][b]
center]السلام عليكم ورحمة الله وبركاته
هذي يا حبيبي أنتا وهوه قصة واحد من الشباب عندنا من جدة أنا صراحة ضربت صديقي إلي قلي هيا ليش حتعرفو ليش بعد ما تقرو القصة والله يستر محد يرسلي صاروخ على بيتي .
بسم الله
هذا واحد اسمو ماجد يوسف الراجل ماشالله عليه ولد نعمة ( ريتش بيبول) وكان الصلى على النبي يضربه المثل في بر الأهل ( اللهم أعنا على بر ولدينا ) والراجل سمعتو زي اللوز المهم الواد درس ودرس لين ما أتخرج من الثانوية العامة ماشالله عليه 98.5% علمي على فكرة هو وحيد أمو وأبوه
وشوية أبوه قلو يولدي أنا أبغاك تتعب وتشقى زي ما أنا شقيت وكديت وذقت الحلو والمر لا تفكرني بجيبك عندي الشركة على طول انتا لازم تبدى من الصفر يولدي.
الواد راح يدور على عمل لين الله رزقو بوظيفة حلوة وراتب أحلى ( بالنسبة للبور بيبول ) ودوام زي السمبوسة والله وبس وقعد يشتغل الولد ومشى في نفس الشركة خمس سنوات لكن
جاء يوم الراجل من العمل وخش البيت وسلم حبتين على رأس الغالية أمو وحبتين كمان على رأس الغالي أبوه بس لقي أبوه وجهي مو طبيعي سأل الواد أبوه وقلو يبويا اشبك انتا اليوم منتا أبويا يوسف إلي أعرفو .
قام الأبو وقال للأم سيبيني مع الواد شوية قالت الأم أبشر يا أبو ماجد .
قال الأبو اسمع يولدي انتا ألآن كبرت وكل يوم تكبر في عيوني الله يوفقك وجاء اليوم إلي أعطيك فيه ما كنت أكتمو طول عمري أنا خلاص ماني زي أول يولدي أنا كبرت في السن .
الأبو طلع ورقة من الخزنة حقتو إلى في البيت الورقة عبارة عن مغلف ( ظرف ) وقال اسمع يماجد يولدي أبعطييك الورقة هاذي لكن ما تفكها ولا تقراها ولا تعطيها أحد مهما كانت الظروف ومهما كانت الأحوال إلا إذا تجمعت ثلاث حالات .
الولد ماجد قال أبشر يبويا إنشالله أبيض وجهك وانتا تعرفني أنا عمري ما عصيتك لا انتا ولا أمي الحبيبه بس قلي ايش الثلاث حالات إلي افك فيها الظرف .
قلو أبوه اسمعني كويس يبني يماجد الحالة الأولى تكون وحيد لا أنا ولا أمك عندك والحالة الثانية تكون متغرب عن بلدك وطنك يولدي والحالة الثاثلة ما حولك أحد إلا الله سبحانه وتعالى .
الواد ماجد قال خلاص يبويا زي ما قلتلي
ومرت يومين ثلاثة أسبوع أسبوعين إلا ماجد قام يفكر ( طبعاً ملعون الجدف ابليس جالو ) ليش أبويا أعطاني الورقة هاذي وليش قلي كذا بس أخاف افك الورقة وأبويا يدري اني فكيتها بس انا أثق في رئيس القسم إلي أنا فيه خليني أكلمو بيني وبينو وقالو .
يافلان أنا أبوبا قلي كيت وكيت وكيت وكيت وهاذي الورقة بس الله يرحملي أمك محد يدري غير رب العباد قلو رئيسو معليك يماجد انتا جيتني وسرك في بطن المحيط .
الرئيس فك الورقة وشوية قفل أمها وقلب وجهو وعصب وقال أنا ماأسكت على الكلام الفاضي هاذا أنا لازم أكلم ريئس الشركة أمثالك مالهم محل عندنا.
وماجد يقولو تكفى يفلان طيب قلي اش فيها عشان اعرف ليش سويت كذا .
وصلت للرئيس الكبير وأنطرد من الشركة بدون حقوق .
وراح للبيت ويومين لاحظ أبوه انو ماير ح العمل قلو يولدي اشبك ماتروح العمل قلو يبويا صارت مشكلة وأنطردت من الشركة قام أبوه يخفف عنو وقالو الله كريم يولدي بكرة الله يفرجها عليك .
وجا يوم على ماجد وخرج يتمشى عندهم في الحارة وصدفة قابل عمدة الحي وقال ليش ما أكلمو على مشكلتي مع الورقة عسالله يشفلي فيها .
وفعلاً وناداه يعم ... يعم .. قالو العمدة أهلم يماجد كيف حالك يبني وكيف أبوك لسى يلعب كورة ولا خلاص شيب هههههههه قلو ماجد والله أبويا بخير أبشرك ولله الحمد بس أنا عندي مشكلة حصلت ليا وأبغاك تحلها بعد الله .
العمدة قلو والله يولدي إذا مقدور عليها أخدمك بعيوني انتا ولد الغالي وولد حارتنا كمان .
قلو ماجد الله يسلمك يعمدة الموضوع انو ابويا قلي كيت وكيت وكيت وكيت وهاذي الورقة وقلت لرئيسي في الشركة وطرد امي منها وقلي أمثالك ماله محل عندنا شوف ايش فيها بس الله يخليك محد يدري إلي فيها إلا رب العباد .
العمدة أخذ الورقة وفكها وقرا نصها وشوية قلب ذاك العمدة الطيب الحبوب وعصب على ماجد وقالو أنتا فيك وفيك وعيب عليك تكون ولد يوسف الراجل الطيب إلي عرفناه صدقني لك أسبوع أشوفك بعدو في الحارة والله لا تقول ماقلتلك .
ماجد أخذ الورقة وفكر وفكر وقال ليش ما أبتعث وأغي جو بالمرة وأطله من الهم إلي أنا أنا فيه وقل أهلو اسمع يبويا وانتي كمان يأمي إذا تبغولي الخير خلوني أروحج إبتعاث لإحدىالدول قلو أبوه الله يوفقك يولدي أنا أبغاك تعتمد على نفسك بارك الله فيك وقالتلو أمو يولدي زورنا لا تقطنا يحبيبي وأعطينا أخبارك أول بأول .
سافر ماجد لإحدى الدول وجلس فيها حق ثلاثة شهور ( الورقة لسى معاه ) وبعد هاذي المدة رجعلو التفكير في الموضوع الأول موضوع الورقة ويقول ليش أنا أنطردت من عملي وليش العمدة طردني كمان خليني أروح مركز شرطة وأتفاهم مع أحد رجال الأمن .
فعلاً قابل ضابط وقالو يحبيبي أنا موضوعي أنو أبوبا قلي كيت وكيت وكيت وكيت وهاذي الورقة أبغاك تشوف ايش فيها بس أمانة عليك محد يدري بالي فيها انا مأبغى أقراها أخاف أبويا يحس اني قريتها ويزعل عليا .
قلو الضابط أشوف الورقة وريني أشوف وقراها الضابط إلا وبس يحبيبي الضابط قلب هولاكو وقلو اسمع معاك ثلاث طرق ترجع بلدك عندك الطيارة أو السفينة أو جثة في تابوت أختار بسرعة .
الواد قال أبغى الطيارة وسلموه أثنين من العسكر لحرس المطار عشان يطلعونه الطياره وجلس في انتظار الرحلة شوية كلم العسكري إلي جمبو قالو أبغى خدمة منك الله يسلمك أبوبا قلي كيت وكيت وكيت وكيت وهاذي الورقة أيغاك تشوف ايش فيها بس أرجوك ما تقل أحد .
العسكري على نياتو قلو وريني الورقة شافها العسكري وقلو أمسك ورقتك معالك دقيقة وحده إذا ما غادرت المطار صدقني أفرغ مخزن المسدس في جسمك .
وخرج ماجد المسكين وحالتو صعبة ويبكي أسى وألم وحزن .
وقدر يلقى رحلة على أول باخره مغادرة للوطن وطلع فيها وما زال يبكي لين منتصف الرحلة أنتبهلو مساعد القبطان وقلو اشبك تبكي فقدت أحد شي مزعلك قلي أنا في خدمتك إذا اقدر .
قلو ماجد بس قبل لا أقلك أوعدني انو محد يدري اني قلتلك ايش محزني .
قلو المساعد إنشالله لك مني وعد في غير معصية الله .
قلو ماجد أنا أبوبا قلي كيت وكيت وكيت وكيت وهاذي الورقة أيغاك تشوف ايش فيها لكن زي ما قلتلك .
شافها المساعد وعلى طول قفل الورقة وأستدعى اثنين من الطاقم وأخذوه للقبطان وماجد يقول للمساعد ليش كذا حرام عليك انتا وعدتني طيب بلاش قلي قلي ايش فيها .
المساعد أعطي القبطان الورقة وقلو الموضوع كيت وكيت وكيت وكيت وهاذي الورقة وشوف انتا ايش رايك .
القبطان قرى الورقة وقال ارموه في البحر هاذا مايستحي بسرعة الأن إلا واحد من أفراد الطاقم قال ياحضرة القبطان ارحمو من في الأرض يرحمكم من في السماء .
قلو القبطان المطلوب قلو هاذا الفرد نعطيلوا قارب نجاه ومؤونة وبعد كذا الله يتولاه .
قال القبطان ماعندي مشكلة مع انو ما يستاهل أشكالو .
وفعلاً رموه مع قارب ومؤونة حقت يومين ومسكين ماجد في عرض البحر والأمواج تلعب فيه هنا وهنا ويبكي بكى محد قد بكي زيو ومر اليوم الأول والثاني وليسى الآدمي في البحر وانتهى الأكل والشرب إلي عندو معد في إلا موية البحر .
وفي لحظة صمت تذكر ماجد كلام أبوه لمن قلو ماتفك الورقة إلا اذا اجتمعت ثلاث حالات وقل لنفسو أنا الآن وحيد لا أمي عندي ولا أبويا جمبي والشي الثاني أنا متغرب عن بلدي والشي الثالث أنا وسط البحر ما حولي أحد لا أنسان لا جماد ولا شي أبداً ماحولي أحد إلا الله مزبوط زي ماقلي أبويا .
قال الآن أقدر أفك الورقة ولا أزعل أبويا ولا ما يحزنون وأعرف ليش أنا أنطردت من عملي وليش العمدة كرشني من الحارة وليش الضابط قلي ترجع بلدك وليش العسكري هددني بالقتل وليش القبطان رامني من السفينة ليش هاذا صرلي ليش ليش .
وقام ماجد وقف في القارب ودخل يدو فجيبو وطلع الورقة وقال انتي ايش فيكي عشان حصلي إلي حصل وجاك يبغى يفكها إلا شويه جات موجة مع ريالح قوية وهزت القارب وكان بيطيح هوا والورقة لكن عنايت الله فوق كل شي .
وهدى البحر شوي وطلع الورقة مرة ثانية ماجد وبيفكها إلا شوي جى هوى وطير الورقة من يد ماجد وراحت راحت الورقة وما عرف ليش الناس طردوه وايش فيها .
من قوة القهر جلس ماجد على القارب وكمل البكى حقو .
ايش رايكم بالله مو قصة ولا مو .
تحياتي أخوكم / A.C.Milan
والسلام عليكم ورحمة الله وبركاته
[/size]
قصة واحد عندنا من جدة
ياشباب يحبايبي .........
تسلم اخويا سندبادي
العرض العادي
